Cuntrestamu in dialettu

E' quasi nannu chi nessunu trasa a sà stanzicella chi, vi pò parira stranu, laiu scoperta sulu stamatina. Eiu penzu  ca, comu tutti i cosi, na lingua umma si perda seddè usara continuamenta, e chissi valu soprattuttu pè nù dialettu. Un parramu poi da capacità chi a parrata nostrana adi pemma vadi dirittu ara questiona e nu modu chi, per esempiu, l'italianu su pò sulu sonnara. Minnè staiu accorgenn eiu stessu cura mamma chi stadi cummìa. A mamma ciadi 85 anni e passa cu vari ictùs ari spalli. Quannu circamu (eiu o  mugghjeramma) ma li dicimu 'cuna cosa in italianu, unsempra capiscia subbitu, ma appena ciù dicu curu termina nostranu chimmancu eiu pensava cavìa (cosa questa interessante), capiscia allistanta. Sa capacità ma parra direttamente aru cora chjù caru cervellu è caratteristica unica du dialettu. Pecchissu i battuti, comu dicia l'amicu Adm, nescianu chi dè na bellezza.

...quannu i posti eru mezzu e comunicaziona su genuini, comu u paisa era parrata e duva sinnatu, allura na ventata d'aria frisca arriva e a discussiona avanza cu facilità, portannu tanta, ma tanta carna a chillu focu russu chi spissillìa e tutti i pori... Na carna, chissa, frisca e genuina chi, comu u russu Ferrari, è targata e passionalità.