Poeti calabresi

La misata

Benedittu lu Guvernu,
cchi ndi duna la misata
pe' la quale, o stati o viernu
curra bona la jornata.

Manna santa de lu cielu
e' pe' ttanti sbinturati
cchju' de mia chi, pe' lu veru,
haju vinti tuminati

de tirrenu abbiviratu,
chi custau 'na vita sana
a marituma, stracquatu
pe' l'America luntana.

Mi passava quindici anni,
e sett'anni ha chi moriu;
mi dassau Sabetta e Gianni
e, moriendu, mi diciu:

"Cicca mia, ti dassu 'mpara,
ca lu fundu e' a nome tua;
la misata si prepara,
e ppue fa chillu chi bua..."

Nommu su' pigghjati nguerra,
mancu all'annu anniversariu,
nci spartivi chilla terra
ma, a parola, a lu mbonariu...

Ca non sai chi tti prepara
chissu mundu tradituri,
chi non potte cuntentara
mancu Cristu, lu Signuri.

E abbinci dui figghj tiegnu
accasati cu li cagni,
sula staju, nommu viegnu
cu nisciunu a liti o lagni.

Staju sula...quandu puozzu!
ca lu sordu e' limasurda:
non si muotica nu muorzu,
ti cumanda, e mmai ti vurda.

Jeri, figghjama Sabetta
(non ha figghj, e affezziunata
tantu a mmia, quand'era schietta)
mi la viju currivata.

E pecchi'?...ca, pe' rifriscu
de marituma bonanima,
nci porgivi a don Franciscu
decemila liri sani.

Mi guardau cu l'uocchi stuorti,
chi restai stramagulata:
'on si cride mancu a li muorti
quandu l'anima e' abbramata!

Certu, e' miegghju pe' mu hai;
ma su cagnu de dinaru
ti cumbina tanti guai
chi non pue cchju' stare mparu.

Nci voliemu tantu bene
quandu nc'era menu sordi,
'mbece mo', chi ognunu tene,
diventammu avari e ngordi.

Quandu piensu a ssu distinu
sientu, cca', nu cuombu amaru,
e mmi vena mu jestimu
lu Guviernu e lu dinaru!

- Elia Pallaria -

Subbr'a strata chi fai
nun tentari 'u ritornu
ppecchi', mpennulata a na spina,
cci trovi 'u dolura chi sai
e ra gioia 'e nu jornu
sprejuta nt'a negghja marina;
i lacrimi misi a na crucia
com'e' na curuna 'e rosariu;
'u risu sbanitu nta l'ariu
cchju' senza culura nne' vucia!

- Emanuele Di Bartolo -

Poesia di Vittorio Butera, dedicata alla "mamma coraggio" di Sersale.

      

A Simana

'U luni nesciu di prima matina,
'u marti aspettu nu bonu patruni,
mercuri passa camina-camina,
jovi mi ncrisciu e mi mintu 'o barcuni,
vennari e' jornu di mala fortuna,
sabatu passa chi figghj dijuni,
dominica e' festa e mi grattu i c...

-Enotrio-

NATALA CU I LUPI

O ventu d’a Sila,
chi arrivi currendu,
chi nova mi porti
stasira venendu?

Moriru li lupi
pe friddu e pe fama;
c’è armenu nt’a notta
na vucia chi chiama?

Tornaru i briganti
lu voscu dassandu,
vicini lu focu
ricoti cantandu?

Cu’ sapa chi dinnu
li pini accoppati,
cuverti de niva,
de jancu pittati!

Stasira è Natala,
è festa d’amuri,
ma u mundu è na guerra,
na hjuma e duluri.

Ed iu tantu affrittu
nte chista vijila
volera ma sugnu
pastura a la Sila.

Ma fazzu u prisepiu
ammenzu li pini,
passandu la festa
cu i lupi vicini.

Cà armenu li lupi
nascendu u bambinu
teneranu mpacia
l’agneddhu vicinu.

E quanta allegrizzi
nte chiddhi paraggi
ma vidi i briganti
vestuti ‘e re magi.

Nte chiddhu silenziu
chi sapa ‘e misteru
chi ducia Natala
facera daveru.

Ammenzu li lupi
ammenzu i briganti
mbischiera nt’a notta
preghieri cu canti.

Sentera stu cora
nu pocu acquetatu
e a notta guardandu
lu celu stiddhatu

videra a cometa
ancora chi fuja,
dappressu currera
gridandu “alleluja”.

- Achille Curcio -

Semplicemente stupenda |

La ninna d’ u briganteju


Veni addormentati
subbra stu sinu,
la hiocca è mammata,
tu puricinu
chi sutt’a l’ali
si ‘ngrugna e sta,
o briganteju,
la ninna fa.


L’occhiuzzi chiudili,
quantu si’ caru!
Tutti guardatili
Ca nci ‘mbilaru;
pari lu suli
ca sindi va,
o briganteju,
la ninna fa.


Crisci: sî orfanu,
lu patri amatu,
briganti ‘ntrepidu,
t’hannu ammazzatu
facendu focu
di ccà e di là,
o briganteju,
la ninna fa.


Vint’anni, cridimi,
non toccau tila,
dormia n’tra l’erbi
ch’havi la Sila,
senza timuri,
senza pietà,
o briganteju,
la ninna fa.


Crisci: assimigghialu
Cà nci sî  figghiu,
nommu sî  timidu
comu connigghiu,
curri a lu varcu,
non stari ccà,
o briganteju,
la ninna fa.


Ti vogghiu vìdari
Cu la scupetta,
cu lu cervuni,
cu la giacchetta,
cu lazzi e ‘nciocioli
‘nquantità,
o briganteju,
la ninna fa.


Potissi vìdari
Mammi e mugghieri,
di li cchiù ‘ntrepidi
briganti veri,
pemmu mi chiamanu,
filicità!
o briganteju,
la ninna fa.

-  Vincenzo Ammirà -

CALAVRISI, JETTATI LA SARMA

Calavrisi, jettati la sarma,
finarmente, ca l'ura e' venuta
e lu fuocu sbampati de l'arma,
ca vidimu s'ancunu lu stuta!
E ssu fuocu verace e cucente
sutta cinnera troppu e' restatu...
Quantu gustu a'mu datu alla gente
ca nue stessi l'aviamu orvicatu.
Nn'hau pigliatu ppe muorti lamati,
ppe sumari de mbastu e capizza,
povarielli, e se su' mberverati
ppe nne dare salure e ricchizza...
A nue... turdi, pezzienti, uocchi chiusi,
ntra ssa terra de santa ciotia...
su' calati, sanguette, piatusi,
a nne dare nna luce, nna via...
E ni l'a'mu trovati a ogne spagnu
de ssa terra, ccu l'ugne alle manu...
Quannu, quannu ve zumpa lu sangu?
Quannu, quannu ve friju le manu?
E cchi fo'? Ni l'avimu scurdatu
de cchi guappu pitignu nascimu?
E mo' simu redutti a nu statu
chi 'un so chine ne zampa lu primu!
S'aru fattu lu paru e lu sparu
ed hau dittu: <
Nn'hau cunzatu chi l'ossa nne paru
puru l'aria la vorranu tutta!
Ma daveru, - teniti le rise -
(si de ridere aviti guliu)
ma daveru ca lu giargianise
ch'ha tri sordi se crida nnu Diu!
Pecchi' tena la manu alla pasta
lu cuvernu lu fa galliare;
su' nna cricca!... Ogne cosa se guasta
e se guasta... ca s'ha de guastare!
Giargianisi ve dicu: Ssa vota
nun ve resia nne' prima, nne' pue!
Si la cricca nne mina la sbota,
Calavrisi, pensamuce nue!
Calavrisi, jettati la sarma!
A ss'agliutti chiudimu le porte,
e ccu core tranquillu, ccu carma,
tra nue tutti ligamune forte.
Si la Sila te jetta nna vuce
de lu mare se levanu l'unne,
Ruventinu lu vientu sue duce
mova e, forte, Asprumunte rispunne.
Si nue, 'nsiemi, litigati, scurdannu
certi nciarmi, ch'attizzanu forte
ccu nna lena, nnu mpignu, n'affannu,
chilli cani, acquattati alle porte,
sulu e sempre teniennu alla mente
nnu penzieru surtantu nchiovatu,
si rumpimu nue, nue sulamente,
chilla corda chi n'ha mpasturatu,
e si sbamba cucente ntra l'arma
chillu fuocu, ssa vota e' frunuta!
Calavrisi, jettati la sarma,
finarmente, ca l'ura e' venuta.

CIARDULLO (MICHELE DE MARCO)

Dalla poesia di Vincenzo Ammira' " La ninna d'u briganteju" nasce quest'adattamento nel dialetto di Carlopoli (CZ) -

"U sangu chi t'abbivara llu core
sangu e' de chillu chi criscìu alla Sila,
sente, palummu mio, chisse parole:
nullu davanti a ttie mu stende fila.
Si a patritta mu arrivi un sidi griju,
si tu te spagni e vuoscura o surdatu,
de mo' io te jestimu, oh higlio mio,
de vipara mu muori 'ntossicatu".

Michele Pane, poeta di Adami di Decollatura (CZ)

A questa poesia e' stato dato ampio spazio sul Forum...Tiremm' innanz... (a passi lunghi e ben distesi)   

Poesia di Michele Pane

Chistu meu paisi

Chistu meu paisi di campagna
canusci d'erba sulu la gramigna:
si chjovi a terra cca mancu si bagna
e l'erbaccia cchju a scippi e cchju' s'alligna.
La genti chi curtiva 'nte penzeri
para ca 'ndavi sulu mali azzioni
e ppa' zzappetta 'ndavi li molari
pemmi strazza la gente i bonu cori.
Li casi 'ntorniati i ruvettari
chi mancu jhuri lassanu jhuriri:
l'omini sunnu tutti tradituri:
genti marvaggia e di nessuna fidi.
Eu penzu ca pa' chistu lu Signuri
sulu gramigna faci cca' crisciri.

(Caterina Zappia)

Ringrazio Admin per avermi indirizzato nel sito delle poesie dialettali.

Ciao Adm, ciao Tommaso
Leiu, apprezzu udaiu tempu
Fuiu, accarezzu aru stessu tempu
Ciao Adm, ciao Tommaso

Ciao Occam, lo so che accarezzi...Specialmente le donne! Ma non scappare, prenditi tempo